തൃശൂർ: തൃശൂരിൽ നടന്ന വൻ റാലിയിൽ പ്രധാനമന്ത്രി നരേന്ദ്ര മോദി ശക്തമായ പ്രസംഗം നടത്തി. തന്റെ സർക്കാരിന്റെ ഭരണനേട്ടങ്ങൾ എണ്ണിപ്പറഞ്ഞ മോദി, വികസനത്തിന്റെയും സ്ത്രീ ശാക്തീകരണത്തിന്റെയും ഗ്യാരണ്ടി നൽകി. എൻഎസ്എസ് സ്ഥാപകൻ മന്നത്ത് പദ്മനാഭനെ അനുസ്മരിച്ചുകൊണ്ടാണ് മോദി പ്രസംഗം ആരംഭിച്ചത്. കെ.വി. കുട്ടിമാളു അമ്മ, അക്കാമ്മ ചെറിയാൻ തുടങ്ങിയ കേരളത്തിലെ പ്രമുഖ വനിതകളെയും അദ്ദേഹം പരാമർശിച്ചു. വനിതാ സംവരണ ബിൽ, മുത്തലാഖ് നിർത്തലാക്കൽ, ഉജ്ജ്വല ഗ്യാസ് പദ്ധതി തുടങ്ങിയ തന്റെ സർക്കാരിന്റെ വനിതാ സൗഹൃദ നടപടികളെ മോദി പ്രകീർത്തിച്ചു.
സംസ്ഥാന സർക്കാരിനെതിരെ രൂക്ഷ വിമർശനവും മോദി ഉന്നയിച്ചു. കേരളത്തിലും ഇന്ത്യാ സഖ്യം നിലനിൽക്കുന്നുണ്ടെന്നും അഴിമതിയുടെ കാര്യത്തിൽ ഇടതുപക്ഷവും കോൺഗ്രസും ഒറ്റക്കെട്ടാണെന്നും അദ്ദേഹം ആരോപിച്ചു. കേന്ദ്ര സർക്കാരിന്റെ വികസന പദ്ധതികൾ മോദി വിരോധത്തിന്റെ പേരിൽ കേരളത്തിൽ നടപ്പാക്കുന്നില്ലെന്നും അദ്ദേഹം കുറ്റപ്പെടുത്തി.
“കേരളത്തിലെ ഇന്ത്യാ സഖ്യത്തേയും ബിജെപി തോൽപ്പിക്കും. ഇന്ത്യാ മുന്നണിയിൽ ഉള്ളവർ കേരളത്തിൽ കൊള്ള നടത്തുന്നു. ഏത് ഓഫീസ് കേന്ദ്രീകരിച്ചാണ് സ്വർണക്കടത്ത് നടന്നതെന്ന് എല്ലാവർക്കും അറിയാം,” മോദി പറഞ്ഞു. പ്രധാനമന്ത്രിയുടെ പ്രസംഗം തൃശൂർ നഗരം ഇളക്കിമറിച്ചു. ആയിരക്കണക്കിന് ആളുകൾ റാലിയിൽ പങ്കെടുത്തു.
