കുവൈറ്റ് സിറ്റി: ഇറാനുനേരെ ഇസ്രായേൽ നടത്തിയ സൈനികാക്രമണത്തെ കുവൈറ്റ് ശക്തമായി അപലപിച്ചു. ഇത് അന്താരാഷ്ട്ര നിയമങ്ങളുടെയും പ്രാദേശിക സുരക്ഷയുടെയും സ്ഥിരതയുടെയും ലംഘനമാണെന്ന് കുവൈറ്റ് വിദേശകാര്യ മന്ത്രാലയം പ്രസ്താവനയിൽ അറിയിച്ചു.
മേഖലയിൽ സംഘർഷം വർദ്ധിപ്പിക്കുന്ന ഇത്തരം നടപടികളിൽ നിന്ന് വിട്ടുനിൽക്കാൻ ഇസ്രായേലിനോട് കുവൈറ്റ് ആവശ്യപ്പെട്ടു. സമാധാനപരമായ ചർച്ചകളിലൂടെയും അന്താരാഷ്ട്ര നിയമങ്ങൾ പാലിച്ചുകൊണ്ടും മാത്രമേ പ്രശ്നങ്ങൾക്ക് ശാശ്വത പരിഹാരം കണ്ടെത്താൻ സാധിക്കൂ എന്ന് കുവൈറ്റ് ഊന്നിപ്പറഞ്ഞു.
ഫലസ്തീനിലെ ഇസ്രായേൽ ആക്രമണങ്ങളെയും കുവൈറ്റ് മുൻപും ശക്തമായി അപലപിച്ചിരുന്നു. പശ്ചിമേഷ്യയിൽ സമാധാനവും സുസ്ഥിരതയും ഉറപ്പാക്കാൻ എല്ലാ കക്ഷികളും സംയമനം പാലിക്കണമെന്നും, അന്താരാഷ്ട്ര സമൂഹം ഇതിൽ സജീവമായി ഇടപെടണമെന്നും കുവൈറ്റ് ആവശ്യപ്പെട്ടു.
