കേരളത്തിൽ റേഷൻ ട്രാൻസ്പോർട്ടേഷൻ കരാറുകാർ അനിശ്ചിതകാല സമരം ആരംഭിച്ചതോടെ റേഷൻ കടകളിലേക്കും എഫ്.സി.ഐ ഗോഡൗണുകളിലേക്കുമുള്ള ധാന്യവിതരണം മുടങ്ങി. ഏതാനും ദിവസത്തെ സ്റ്റോക്ക് മാത്രമാണ് റേഷൻ കടകളിലുള്ളത്. സമരം നീണ്ടാൽ റേഷൻ വിതരണം പൂർണ്ണമായും നിലയ്ക്കും.
കരാറുകാർക്ക് 100 കോടിയോളം രൂപയാണ് സർക്കാർ നൽകാനുള്ളത്. അതിൽ 34 കോടിയെങ്കിലും നൽകണമെന്നാണ് കരാറുകാരുടെ അസോസിയേഷന്റെ ആവശ്യം. 2021 മുതൽ കരാറുകാർക്ക് നൽകേണ്ട പത്ത് ശതമാനം ഓഡിറ്റ് തുക നൽകുന്നില്ലെന്നും അവർ പറയുന്നു.
സർക്കാർ നൽകിയ ഉറപ്പുകളുടെ അടിസ്ഥാനത്തിൽ ജനുവരിയിലെ 50% വിതരണം പൂർത്തിയാക്കിയെങ്കിലും പണം ലഭിക്കാത്തതിനാൽ സമരം ആരംഭിക്കേണ്ടി വന്നതായി കരാറുകാർ പറയുന്നു. സംസ്ഥാന ഭക്ഷ്യ പൊതുവിതരണ വകുപ്പ് 37.14 കോടി രൂപ കുടിശ്ശിക നൽകാനുണ്ടെന്ന് അംഗീകരിച്ച് ധനവകുപ്പ് ഉത്തരവിറക്കിയിട്ടുണ്ട്. മന്ത്രി ജി.ആർ. അനിൽ പറയുന്നത്, സമരം റേഷൻ വിതരണത്തെ ബാധിച്ചിട്ടില്ല എന്നാണ്. ജനുവരി മാസത്തെ 75 ശതമാനം റേഷൻ വിഹിതവും കടകളിൽ എത്തിച്ചിട്ടുണ്ടെന്നും അദ്ദേഹം പറഞ്ഞു.
കരാറുകാർക്ക് 2023 സെപ്റ്റംബർ വരെയുള്ള കമ്മീഷൻ പൂർണ്ണമായും നവംബറിലെ കമ്മീഷൻ ഭാഗികമായും നൽകിയിട്ടുണ്ടെന്നും നവംബറിലെ കുടിശ്ശികയും ഡിസംബറിലെ കമ്മീഷൻ പൂർണ്ണമായും നൽകുന്നതിന് 38 കോടി രൂപയും സർക്കാർ അനുവദിച്ചിട്ടുണ്ടെന്നും മന്ത്രി വ്യക്തമാക്കി. വസ്തുത മനസ്സിലാക്കി സമരം അവസാനിപ്പിക്കണമെന്ന് മന്ത്രി കരാറുകാരോട് ആവശ്യപ്പെട്ടു.
