ന്യൂഡൽഹി: രാജ്യത്തെ ജനങ്ങൾക്ക് സാമ്പത്തിക-സാമൂഹിക-രാഷ്ട്രീയ നീതി ഉറപ്പാക്കുന്നതിനായി കോൺഗ്രസ് പാർട്ടി ആരംഭിക്കുന്ന ‘ഭാരത് ജോഡോ ന്യായ് യാത്ര’യുടെ ലോഗോയും മുദ്രാവാക്യവും പുറത്തിറങ്ങി. ‘ഭാരത് ജോഡോ ന്യായ് യാത്ര, നമുക്ക് നീതി കിട്ടും വരെ’ എന്നാണ് യാത്രയുടെ മുദ്രാവാക്യം.
ഡൽഹി കോൺഗ്രസ് ആസ്ഥാനത്ത് നടന്ന ചടങ്ങിൽ കോൺഗ്രസ് അധ്യക്ഷൻ മല്ലികാർജ്ജുൻ ഖാർഗെ, ജനറൽ സെക്രട്ടറിമാരായ ജയറാം രമേശ്, കെ.സി. വേണുഗോപാൽ എന്നിവർ പങ്കെടുത്തു.
യാത്ര ജനുവരി 14 ന് രാഹുൽ ഗാന്ധിയുടെ നേതൃത്വത്തിൽ മണിപ്പൂരിലെ ഇംഫാലിൽ ആരംഭിച്ച് 66 ദിവസം നീണ്ട് മാർച്ച് 20 ന് മുംബൈയിൽ അവസാനിക്കും. 15 സംസ്ഥാനങ്ങളിലൂടെയാണ് യാത്ര കടന്നുപോകുന്നത്.
രാജ്യത്തെ ജനങ്ങൾ നേരിടുന്ന സാമ്പത്തിക പ്രതിസന്ധി, വിലക്കയറ്റം, തൊഴിലില്ലായ്മ, വർഗ്ഗീയത തുടങ്ങിയ പ്രശ്നങ്ങളെക്കുറിച്ച് ജനങ്ങളെ ബോധവൽക്കരിക്കുകയും അവർക്ക് നീതി ലഭ്യമാക്കുന്നതിനായി പോരാടുകയും ചെയ്യുക എന്നതാണ് യാത്രയുടെ ലക്ഷ്യം.
ചടങ്ങിൽ പ്രധാനമന്ത്രി നരേന്ദ്ര മോദിക്കെതിരെ രൂക്ഷ വിമർശനം ഉയർത്തി സംസാരിക്കുകയായിരുന്നു മല്ലികാർജ്ജുൻ ഖാർഗെ. കലാപം നടക്കുന്ന മണിപ്പൂരിലേക്ക് പ്രധാനമന്ത്രി ഒരിക്കൽ പോലും പോയിട്ടില്ലെന്നും പാർലമെന്റിൽ സംസാരിക്കാനും പ്രശ്നങ്ങൾ ഉന്നയിക്കാനും കോൺഗ്രസിന് അവസരം നിഷേധിക്കുകയാണെന്നും അദ്ദേഹം ആരോപിച്ചു.
