ടെഹ്റാൻ/ടെൽ അവീവ്: ഇസ്രായേലും ഇറാനും തമ്മിലുള്ള വെടിനിർത്തൽ നിലവിൽ വന്നതോടെ, ആഗോള വിപണിയിൽ അസംസ്കൃത എണ്ണവില രണ്ടാഴ്ചത്തെ ഏറ്റവും താഴ്ന്ന നിലയിലേക്ക് കൂപ്പുകുത്തി. പശ്ചിമേഷ്യയിലെ സംഘർഷാവസ്ഥ അയഞ്ഞതാണ് എണ്ണവില കുറയാൻ പ്രധാന കാരണം.
ഇസ്രായേലും ഇറാനും വെടിനിർത്തലിന് ധാരണയായതായി അമേരിക്കൻ പ്രസിഡന്റ് ഡോണൾഡ് ട്രംപ് അറിയിച്ചതിന് പിന്നാലെയാണ് എണ്ണവിലയിൽ ഗണ്യമായ കുറവുണ്ടായത്. ബ്രെന്റ് ക്രൂഡ് ഓയിലിന് ബാരലിന് 67.7 ഡോളറായി വില താഴ്ന്നു. യുഎസ് വെസ്റ്റ് ടെക്സാസ് ഇന്റർമീഡിയറ്റ് ക്രൂഡിന്റെ വില ബാരലിന് 64.76 ഡോളറായും കുറഞ്ഞു.
പശ്ചിമേഷ്യയിലെ സംഘർഷങ്ങൾ ഹൊർമുസ് കടലിടുക്കിലെ എണ്ണ ഗതാഗതത്തെ ബാധിക്കുമോ എന്ന ആശങ്ക നിലനിന്നിരുന്നു. ലോകത്തിലെ 20% എണ്ണ കയറ്റുമതിയും നടക്കുന്നത് ഈ കടലിടുക്കിലൂടെയാണ്. വെടിനിർത്തൽ പ്രഖ്യാപിച്ചതോടെ ഈ ആശങ്കകൾക്ക് അയവ് വരികയും എണ്ണ വിതരണത്തിൽ തടസ്സമുണ്ടാകില്ലെന്ന പ്രതീക്ഷ വർധിക്കുകയും ചെയ്തു. ഇത് എണ്ണവില കുറയാൻ ഒരു പ്രധാന കാരണമായി.
ഇറാൻ പ്രതിദിനം ഏകദേശം 3.3 ദശലക്ഷം ബാരൽ ക്രൂഡ് ഓയിൽ ഉത്പാദിപ്പിക്കുന്നുണ്ട്, ഇത് ആഗോള എണ്ണ ഉത്പാദനത്തിന്റെ 3% വരും. ഇറാനിൽ നിന്നുള്ള കയറ്റുമതി സുഗമമാവുന്നത് വിപണിയിൽ എണ്ണയുടെ ലഭ്യത വർദ്ധിപ്പിക്കുകയും വില കുറയാൻ സഹായിക്കുകയും ചെയ്യും.
അതേസമയം, ആഗോള എണ്ണവില കുറഞ്ഞെങ്കിലും ഇന്ത്യയിൽ പെട്രോൾ, ഡീസൽ വിലയിൽ ഉടനടി മാറ്റമുണ്ടാകുമോ എന്ന് വ്യക്തമല്ല. രാജ്യാന്തര വിപണിയിലെ വിലയിടിവ് ഇന്ത്യയുടെ എണ്ണ ഇറക്കുമതി ബില്ലിനും പണപ്പെരുപ്പത്തിനും ആശ്വാസകരമാവുമെന്നാണ് സാമ്പത്തിക വിദഗ്ധർ വിലയിരുത്തുന്നത്.
The post ഇസ്രായേൽ-ഇറാൻ വെടിനിർത്തൽ: എണ്ണവില രണ്ടാഴ്ചത്തെ ഏറ്റവും താഴ്ന്ന നിലയിൽ appeared first on Metro Journal Online.
