ഗാസ സിറ്റി: ഇസ്രായേൽ ഗാസയിൽ നടത്തുന്ന ആക്രമണങ്ങളിൽ കൊല്ലപ്പെട്ട പലസ്തീനികളുടെ എണ്ണം ഏകദേശം ഒരു ലക്ഷത്തോളമെത്തിയെന്ന് പുതിയ പഠനം. ഗാസ ആരോഗ്യ മന്ത്രാലയം പുറത്തുവിട്ട കണക്കുകളേക്കാൾ വളരെ കൂടുതലാണ് ഈ പുതിയ കണ്ടെത്തൽ.
ലണ്ടൻ യൂണിവേഴ്സിറ്റിയിലെ പ്രൊഫസറായ മൈക്കിൾ സ്പാഗറ്റ് നടത്തിയ പഠനത്തെ ഉദ്ധരിച്ചുകൊണ്ടാണ് ഈ പുതിയ റിപ്പോർട്ട്. ഗാസയിലെ 2,000 കുടുംബങ്ങളിൽ നടത്തിയ സർവേയുടെ അടിസ്ഥാനത്തിലാണ് ഈ പഠനം. 2025 ജനുവരി വരെയുള്ള കണക്കുകൾ പ്രകാരം ഏകദേശം 75,200 പേർക്ക് അക്രമങ്ങളിലൂടെ ജീവൻ നഷ്ടപ്പെട്ടു എന്നാണ് പഠനം പറയുന്നത്. ഇതിൽ ഭൂരിഭാഗം മരണങ്ങൾക്കും കാരണം ഇസ്രായേലിന്റെ ആക്രമണങ്ങളാണെന്നും പഠനം വ്യക്തമാക്കുന്നു.
കൂടാതെ, പട്ടിണി, രോഗങ്ങൾ, ആരോഗ്യസംവിധാനങ്ങളുടെ തകർച്ച എന്നിവ കാരണം ഏകദേശം 8,540 പേർക്ക് കൂടി ജീവൻ നഷ്ടപ്പെട്ടിട്ടുണ്ടെന്നും പഠനം കൂട്ടിച്ചേർക്കുന്നു. ഇതോടെ ആകെ മരണസംഖ്യ ഏകദേശം 84,000-ൽ അധികമാകുന്നു. ഗാസയിലെ ജനസംഖ്യയുടെ ഏകദേശം 4% പേർക്ക് ഇതിനോടകം ജീവൻ നഷ്ടപ്പെട്ടുവെന്നും ഈ കണക്കുകൾ സൂചിപ്പിക്കുന്നു.
നിലവിൽ ഗാസ ആരോഗ്യ മന്ത്രാലയം പുറത്തുവിട്ട കണക്കുകൾ പ്രകാരം 56,000-ൽ അധികം ആളുകൾക്കാണ് ജീവൻ നഷ്ടപ്പെട്ടത്. എന്നാൽ പുതിയ പഠനം ഔദ്യോഗിക കണക്കുകളേക്കാൾ 39 ശതമാനം അധികം മരണങ്ങൾ സംഭവിച്ചുവെന്നാണ് പറയുന്നത്.
കൊല്ലപ്പെട്ടവരിൽ 56 ശതമാനത്തിലധികം പേരും കുട്ടികളോ സ്ത്രീകളോ ആണെന്നും പഠനം ചൂണ്ടിക്കാട്ടുന്നു. മറ്റ് സമീപകാല സംഘർഷങ്ങളെ അപേക്ഷിച്ച് ഗാസയിൽ സ്ത്രീകളും കുട്ടികളും കൊല്ലപ്പെടുന്നതിന്റെ അനുപാതം ഇരട്ടിയിലധികമാണെന്നും ഇത് വ്യക്തമാക്കുന്നു. അന്താരാഷ്ട്ര തലത്തിൽ വെടിനിർത്തലിനായുള്ള ആവശ്യങ്ങൾ ശക്തമായിട്ടും ഇസ്രായേൽ സൈന്യം ഗാസയിൽ ആക്രമണങ്ങൾ തുടരുകയാണ്.
