സൗദി അറേബ്യയിൽ ജൂലൈ, ഓഗസ്റ്റ് മാസങ്ങളിൽ ഉയർന്ന താപനിലയും മഴയും പ്രവചിച്ച് കാലാവസ്ഥാ കേന്ദ്രം
റിയാദ്: സൗദി അറേബ്യയിൽ വരുന്ന ജൂലൈ, ഓഗസ്റ്റ് മാസങ്ങളിൽ ഉയർന്ന താപനിലയും ചില പ്രദേശങ്ങളിൽ സാധാരണയിൽ കൂടുതൽ മഴയും ലഭിക്കാൻ സാധ്യതയുണ്ടെന്ന് ദേശീയ കാലാവസ്ഥാ കേന്ദ്രം (NCM) പ്രവചിച്ചു. രാജ്യത്തിന്റെ മധ്യ, വടക്കൻ, കിഴക്കൻ പ്രദേശങ്ങളിലാണ് താപനില ഗണ്യമായി ഉയരുന്നത്.
റിയാദ്, ഖസിം, ഹായിൽ, കിഴക്കൻ, വടക്കൻ അതിർത്തി പ്രദേശങ്ങൾ എന്നിവിടങ്ങളിൽ താപനില ശരാശരിയേക്കാൾ 1 ഡിഗ്രി സെൽഷ്യസ് വരെ ഉയരാൻ സാധ്യതയുണ്ട്. ഓഗസ്റ്റ് മാസത്തോടെ ഇത് ഏറ്റവും ഉയർന്ന നിലയിലെത്തുമെന്നും, ജൗഫ്, തബൂക്ക്, ഖസിം, ഹായിൽ, കിഴക്കൻ മേഖലകൾ എന്നിവിടങ്ങളിൽ 1.2 ഡിഗ്രി സെൽഷ്യസ് വരെ വർദ്ധനവ് പ്രതീക്ഷിക്കുന്നതായും NCM അറിയിച്ചു.
മഴയുടെ കാര്യത്തിൽ, നജ്റാൻ, ജിസാൻ, അൽ-ബാഹ, അസിർ, മക്കയുടെയും മദീനയുടെയും ചില ഭാഗങ്ങൾ, തെക്കൻ റിയാദ്, കിഴക്കൻ പ്രദേശങ്ങൾ എന്നിവിടങ്ങളിൽ ജൂലൈയിലും ഓഗസ്റ്റിലും സാധാരണയിൽ കൂടുതൽ മഴ ലഭിക്കാൻ സാധ്യതയുണ്ടെന്ന് NCM പ്രവചിക്കുന്നു. രാജ്യത്തിന്റെ മറ്റ് ഭാഗങ്ങളിൽ സാധാരണ മഴ ലഭിക്കുമെന്നും റിപ്പോർട്ടിൽ പറയുന്നു.
1991 മുതൽ 2020 വരെയുള്ള കാലാവസ്ഥാ സാഹചര്യങ്ങളെ അടിസ്ഥാനമാക്കിയാണ് 2025 ജൂൺ മുതൽ ഓഗസ്റ്റ് വരെയുള്ള ഈ വേനൽക്കാല പ്രവചനം തയ്യാറാക്കിയിരിക്കുന്നത്.
മുൻകാല റെക്കോർഡുകൾ പ്രകാരം, 2010 ജൂണിൽ ജിദ്ദയിൽ 52 ഡിഗ്രി സെൽഷ്യസും, 2024 ജൂലൈയിൽ അൽ-അഹ്സയിൽ 51.3 ഡിഗ്രി സെൽഷ്യസും താപനില രേഖപ്പെടുത്തിയിട്ടുണ്ട്. മഴയുടെ കാര്യത്തിൽ, 2024 ഓഗസ്റ്റിൽ ജിസാനിലെ തെക്കുപടിഞ്ഞാറൻ മേഖലയിൽ ഒരു ദിവസം 113 മില്ലിമീറ്റർ മഴ ലഭിച്ചതാണ് ഉയർന്ന റെക്കോർഡ്. 1995 ജൂലൈയിൽ 67.6 മില്ലിമീറ്ററും ഇവിടെ രേഖപ്പെടുത്തിയിട്ടുണ്ട്.
