സ്ലാപ്ഗേറ്റ് വിവാദത്തെ ഹർഭജൻ കച്ചവടമാക്കുന്നു; പരസ്യത്തിലൂടെ ഒരുകോടിയോളം രൂപ സമ്പാദിച്ചു: ശ്രീശാന്ത്

ഇന്ത്യൻ പ്രീമിയർ ലീഗിന്റെ ആദ്യ സീസണിൽ ക്രിക്കറ്റ് ലോകത്തെ ഞെട്ടിച്ച ‘സ്ലാപ്ഗേറ്റ്’ വിവാദം 18 വർഷങ്ങൾക്കിപ്പുറം വീണ്ടും തലപൊക്കുന്നു. മുൻ ഇന്ത്യൻ ഓഫ് സ്പിന്നർ ഹർഭജൻ സിംഗിനെതിരെ രൂക്ഷവിമർശനവുമായി മുൻ പേസർ എസ്. ശ്രീശാന്ത് രംഗത്തെത്തി. 2008-ൽ തന്നെ തല്ലിയ സംഭവത്തെ ഹർഭജൻ സിംഗ് സാമ്പത്തിക ലാഭത്തിനായി ഉപയോഗിക്കുന്നു എന്നാണ് ശ്രീശാന്തിന്റെ ആരോപണം. ഇതിന്റെ പ്രതിഷേധമായി ഹർഭജനെ ഇൻസ്റ്റഗ്രാമിൽ ബ്ലോക്ക് ചെയ്തതായും ശ്രീശാന്ത് വെളിപ്പെടുത്തി.

ഒരു മലയാളം വാർത്താ മാധ്യമത്തിന് നൽകിയ അഭിമുഖത്തിലാണ് ശ്രീശാന്ത് തന്റെ പ്രതിഷേധം പരസ്യമാക്കിയത്. സ്ലാപ്ഗേറ്റ് വിവാദത്തെ ഹാസ്യാത്മകമായി ചിത്രീകരിക്കുന്ന ഒരു ടെലിവിഷൻ പരസ്യത്തിൽ ഹർഭജൻ അഭിനയിച്ചതാണ് ശ്രീശാന്തിനെ ചൊടിപ്പിച്ചത്. ഈ പരസ്യത്തിലൂടെ ഹർഭജൻ ഒരുകോടിയോളം രൂപ സമ്പാദിച്ചെന്നും ആ വീഡിയോ സോഷ്യൽ മീഡിയയിൽ പങ്കുവെക്കാൻ തന്നെ വിളിച്ചു ആവശ്യപ്പെട്ടെന്നും ശ്രീശാന്ത് പറഞ്ഞു.

മാപ്പ് നൽകും, പക്ഷേ മറക്കില്ല

“അടുത്തിടെ വരെ ഞാനിതിനെക്കുറിച്ച് സംസാരിച്ചിരുന്നില്ല. എന്നാൽ അദ്ദേഹം വീണ്ടും ആ സംഭവത്തെക്കുറിച്ച് ഒരു പരസ്യം ചെയ്തു. അതിലൂടെ 80 ലക്ഷം മുതൽ ഒരുകോടി രൂപ വരെ അദ്ദേഹം സമ്പാദിച്ചു. എന്നിട്ട് എന്നെ വിളിച്ച് ആ വീഡിയോ സ്റ്റോറിയായി ഇടാൻ ആവശ്യപ്പെട്ടു. ഞാൻ അദ്ദേഹത്തോട് പറഞ്ഞു, ‘ഞാൻ മാപ്പ് നൽകും, പക്ഷേ ഒരിക്കലും മറക്കില്ല’. ഒരാൾ നിങ്ങളോട് തെറ്റ് ചെയ്താൽ അവർക്ക് മാപ്പ് നൽകണം, പക്ഷേ അത് മറന്നുപോയാൽ അവർ വീണ്ടും അത് ആവർത്തിക്കും. അതിന് ഏറ്റവും വലിയ ഉദാഹരണമാണ് അദ്ദേഹം,” ശ്രീശാന്ത് വ്യക്തമാക്കി.

അഭിനയം സ്വീകരിക്കാനാവില്ല

ഹർഭജനുമായി ഇനി യാതൊരു ബന്ധവുമില്ലെന്ന് ശ്രീശാന്ത് പറഞ്ഞു. “ഞാൻ അദ്ദേഹത്തെ ഒരു സഹോദരനെപ്പോലെയാണ് കണ്ടിരുന്നത്. എന്നാൽ കഴിഞ്ഞ ഒന്നോ രണ്ടോ മാസമായി അദ്ദേഹം ചെയ്ത കാര്യങ്ങൾ കാരണം ഞാൻ അദ്ദേഹത്തെ ഇൻസ്റ്റഗ്രാമിൽ ബ്ലോക്ക് ചെയ്തു. പല അഭിമുഖങ്ങളിലും അദ്ദേഹം എന്റെ മകളെക്കുറിച്ചൊക്കെ സംസാരിക്കുന്നത് കണ്ടു. അദ്ദേഹം വലിയ ആളാണെന്ന് ലോകം വിചാരിക്കാൻ വേണ്ടിയുള്ള അഭിനയമാണത്. ഇന്ത്യയ്ക്ക് വേണ്ടി കളിച്ച കാലം മുതൽ ഇന്നുവരെയുള്ള അദ്ദേഹത്തിന്റെ ഈ അഭിനയം എനിക്ക് അംഗീകരിക്കാനാവില്ല,” ശ്രീശാന്ത് കൂട്ടിച്ചേർത്തു.

എന്താണ് സ്ലാപ്ഗേറ്റ് വിവാദം?

2008 ഏപ്രിലിൽ മുംബൈ ഇന്ത്യൻസും കിംഗ്‌സ് ഇലവൻ പഞ്ചാബും തമ്മിലുള്ള മത്സരത്തിന് പിന്നാലെയാണ് വിവാദ സംഭവം ഉണ്ടായത്. മത്സരശേഷം ഹാൻഡ്‌ഷെയ്ക്കിനിടെ ഹർഭജൻ ശ്രീശാന്തിനെ തല്ലുകയും മൈതാനത്ത് വെച്ച് ശ്രീശാന്ത് പൊട്ടിക്കരയുകയും ചെയ്തു. സംഭവത്തെത്തുടർന്ന് ഹർഭജനെ ആ ഐപിഎൽ സീസണിൽ നിന്ന് വിലക്കുകയും മാച്ച് ഫീ മുഴുവനായി പിഴ ഈടാക്കുകയും ചെയ്തിരുന്നു. കഴിഞ്ഞ വർഷം ഈ സംഭവത്തിന്റെ ഹൈ-ഡെഫനിഷൻ ദൃശ്യങ്ങൾ ലളിത് മോദി പുറത്തുവിട്ടത് വീണ്ടും വലിയ ചർച്ചകൾക്ക് വഴിവെച്ചിരുന്നു.