ഗുജറാത്തിൽ രണ്ട് ദിവസത്തെ സന്ദർശനത്തിന് തുടക്കമിട്ട് പ്രധാനമന്ത്രി മോദി; വഡോദരയിൽ റോഡ്‌ഷോ
വഡോദര: പ്രധാനമന്ത്രി നരേന്ദ്ര മോദി രണ്ട് ദിവസത്തെ ഗുജറാത്ത് സന്ദർശനത്തിന് തുടക്കമിട്ട് വഡോദരയിൽ റോഡ്‌ഷോ നടത്തി. സംസ്ഥാനത്ത് ഏകദേശം 82,000 കോടി രൂപയുടെ വിവിധ വികസന പദ്ധതികൾക്ക് പ്രധാനമന്ത്രി തറക്കല്ലിടുകയും ഉദ്ഘാടനം ചെയ്യുകയും ചെയ്യും.
വഡോദരയിൽ ആയിരക്കണക്കിന് ജനങ്ങൾ തടിച്ചുകൂടിയ റോഡ്‌ഷോയിൽ വൻ സ്വീകരണമാണ് പ്രധാനമന്ത്രിക്ക് ലഭിച്ചത്. തുടർന്ന് ദാഹോദിലേക്ക് തിരിച്ച അദ്ദേഹം, അവിടെ ഇന്ത്യൻ റെയിൽവേയുടെ ലോക്കോമോട്ടീവ് നിർമ്മാണ പ്ലാന്റ് രാജ്യത്തിന് സമർപ്പിച്ചു. 9000 എച്ച്പി ശേഷിയുള്ള ഇലക്ട്രിക് ലോക്കോമോട്ടീവുകൾ ആഭ്യന്തര ആവശ്യങ്ങൾക്കും കയറ്റുമതിക്കുമായി ഇവിടെ ഉത്പാദിപ്പിക്കും. ദാഹോദിൽ ഏകദേശം 24,000 കോടി രൂപയുടെ വിവിധ വികസന പദ്ധതികളുടെ ഉദ്ഘാടനവും തറക്കല്ലിടലും പ്രധാനമന്ത്രി നിർവഹിച്ചു.
വെരാവൽ-അഹമ്മദാബാദ് വന്ദേ ഭാരത് എക്സ്പ്രസ്, വാൽസാദ്-ദാഹോദ് എക്സ്പ്രസ് എന്നിവയുൾപ്പെടെ പുതിയ ട്രെയിനുകൾക്ക് പ്രധാനമന്ത്രി ഫ്ലാഗ് ഓഫ് ചെയ്യും. ദാഹോദിലെ പൊതുപരിപാടിക്ക് ശേഷം അദ്ദേഹം ഭുജിലേക്ക് തിരിക്കും. അവിടെ 53,000 കോടിയിലധികം രൂപയുടെ വികസന പദ്ധതികൾക്ക് തറക്കല്ലിടുകയും ഉദ്ഘാടനം ചെയ്യുകയും ചെയ്യും. കാണ്ട്ല തുറമുഖം, സൗരോർജ്ജ പ്ലാന്റുകൾ, വൈദ്യുതി പ്രസരണ സംവിധാനങ്ങൾ, റോഡ് നിർമ്മാണം തുടങ്ങിയ അടിസ്ഥാന സൗകര്യ വികസന പദ്ധതികൾ ഇതിൽ ഉൾപ്പെടുന്നു.
മെയ് 27-ന് പ്രധാനമന്ത്രി ഗാന്ധിനഗറിൽ നടക്കുന്ന ‘ഗുജറാത്ത് അർബൻ ഗ്രോത്ത് സ്റ്റോറി’യുടെ 20 വർഷം ആഘോഷിക്കുന്ന പരിപാടിയിൽ പങ്കെടുക്കും. അവിടെ ‘അർബൻ ഡെവലപ്‌മെന്റ് ഇയർ 2025’ ന് അദ്ദേഹം തുടക്കമിടും. നഗരവികസനം, ആരോഗ്യം, ജലവിതരണം എന്നിവയുമായി ബന്ധപ്പെട്ട നിരവധി പദ്ധതികൾക്ക് അദ്ദേഹം തറക്കല്ലിടുകയും ഉദ്ഘാടനം ചെയ്യുകയും ചെയ്യും. പ്രധാനമന്ത്രി ആവാസ് യോജനയ്ക്ക് കീഴിൽ നിർമ്മിച്ച 22,055 വീടുകളും അദ്ദേഹം ഉദ്ഘാടനം ചെയ്യും.
