ട്രംപിന്റെ ഭീഷണികൾക്കിടയിൽ യൂറോപ്യൻ ഐക്യം ഊട്ടിയുറപ്പിക്കാൻ മാക്രോൺ ഗ്രീൻലാൻഡ് സന്ദർശിക്കുന്നു
ഡൊണാൾഡ് ട്രംപിന്റെ ഗ്രീൻലാൻഡ് സ്വന്തമാക്കാനുള്ള ഭീഷണികൾക്കിടയിൽ യൂറോപ്യൻ ഐക്യം ശക്തിപ്പെടുത്തുന്നതിന്റെ ഭാഗമായി ഫ്രഞ്ച് പ്രസിഡന്റ് ഇമ്മാനുവൽ മാക്രോൺ ഗ്രീൻലാൻഡ് സന്ദർശിക്കാൻ ഒരുങ്ങുന്നു. ഈ മാസം 15-ന് ഗ്രീൻലാൻഡിലെത്തുന്ന മാക്രോൺ, ഗ്രീൻലാൻഡ് പ്രധാനമന്ത്രി ജെൻസ്-ഫ്രെഡറിക് നീൽസൺ, ഡാനിഷ് പ്രധാനമന്ത്രി മെറ്റെ ഫ്രെഡറിക്സൻ എന്നിവരുമായി കൂടിക്കാഴ്ച നടത്തും.
വടക്കൻ അറ്റ്‌ലാന്റിക്കിലെയും ആർട്ടിക്കിലെയും സുരക്ഷ, കാലാവസ്ഥാ വ്യതിയാനം, ഊർജ്ജ പരിവർത്തനം, നിർണായക ധാതുക്കൾ എന്നിവയെക്കുറിച്ച് നേതാക്കൾ ചർച്ച ചെയ്യുമെന്ന് ഫ്രഞ്ച് പ്രസിഡന്റ് കാര്യാലയം അറിയിച്ചു. ഗ്രീൻലാൻഡ് ഒരു രാജ്യത്തിന്റെ സ്വത്തല്ലെന്നും അത് വിൽക്കാനുള്ളതല്ലെന്നും ഗ്രീൻലാൻഡ് പ്രധാനമന്ത്രി ജെൻസ്-ഫ്രെഡറിക് നീൽസൺ നേരത്തെ വ്യക്തമാക്കിയിരുന്നു.
കഴിഞ്ഞ കുറച്ചു മാസങ്ങളായി നിലനിൽക്കുന്ന പ്രതിസന്ധി നിറഞ്ഞ വിദേശനയ സാഹചര്യത്തിൽ, യൂറോപ്യൻ ഐക്യത്തിന്റെ ദൃഢമായ തെളിവാണ് മാക്രോണിന്റെ ഈ സന്ദർശനമെന്ന് ഡാനിഷ് പ്രധാനമന്ത്രി മെറ്റെ ഫ്രെഡറിക്സൻ പറഞ്ഞു. ധാതു സമ്പന്നവും തന്ത്രപ്രധാനവുമായ ഈ ആർട്ടിക് ദ്വീപിന്മേലുള്ള യു.എസ്. താൽപ്പര്യങ്ങൾക്കിടയിലാണ് യൂറോപ്യൻ യൂണിയന്റെ പ്രമുഖ നേതാക്കളിലൊരാളായ മാക്രോണിന്റെ ഈ സന്ദർശനം.
ഈ സന്ദർശനം ആർട്ടിക് മേഖലയുമായുള്ള സഹകരണം ശക്തിപ്പെടുത്താനും യൂറോപ്യൻ പരമാധികാരം ഉറപ്പാക്കാനും സഹായിക്കുമെന്നും ഫ്രഞ്ച് പ്രസിഡന്റ് കാര്യാലയം കൂട്ടിച്ചേർത്തു.
